Nairobi (Alshahid)-Warbixin ay dhawaan soo saartay hay’ad la yiraahdo World Peace Foundation, ayna ku midaysan yihiin; aqoonyahano, sharci yaqaano, saraakiil military ah iyo kuwo ku taqasusay dhinaca badaha ayaa lagu sheegay in shirkado ah kuwo sharciyada, amaanka, duulimaayada iyo waliba dhinaca badaha oo laga leeyahay dalka Kenya ay ku howlan yihiin sii socoshada Burcad badeenimada ka jirta dalka Soomaaliya.
Warbixinta ayaa lagu sheegay in Burcad badeeda Soomaaliya ay yihiin kudhowaad 1,500 oo ruux, oo u kala qaybsan 7 kooxoodna ayna maamulaan dhowr shakhsi oo isku ujeedo ah, balse xarumaha laga kala maamulo ay ku kala yaalaan wadamada; Kenya, Dubai, Lebanon, Somalia iyo kuwo katirsan dalalka European.
“Shirkadaha amaanka iyo sharciga ee dalka Kenya waxa ay fududeeyaan sidii ay u wada xaajoon lahaayeen Burcad badeeda iyo dadka leh maraakiibta la haysto, waxaana lacagta madax furashada lasoo mariyaa shirkadaha dalka Kenya kuwaasi oo u geeya Burcad badeeda afduubka geysatay.” Ayaa lagu sheegay warbixinta World Peace Foundation.
Mid kamid ah saraakiisha dhinaca baddaha ee dalka Kenya oo codsaday inaan magaciisa la sheegin xasaasinimada arrinta awgeed ayaa sheegay in shirkado laga leeyahay dalka Kenya ay fududeeyaan wada hadalka dhex mara Burcad badeeda iyo dadka iska leh maraakiibta halkaasina ay shirkadahaasi uga soo baxdo lacag ay ka helaan Burcad badeeda oo loo siiyo howsha ay fuliyeen.
“Lacagta madax furashada ah waxaa keena dad wakiil u ah kuwa markabka laga haysto, waxa ayna u dhiibaan shirkad Kenyan ah, taasi oo gaarsiisa Burcad badeeda iyaga oo sii marinaya dhinaca badda ama hawada, waxaana loo geeyaa Burcad badeeda haysata markabka.” Ayuu yiri sarkaalkaasi aan la magacaabin.
Burcad badeeda Soomaaliya ayaa markabkii ugu lacag badnaa waxa uu ahaa mid shidaalka qaada oo laga lahaa dalka Greek waxaana ay ka qaadeen lacag dhan 7 milyan oo ah dollarka Maraykanka.
Burcad badeeda ayaa markii ay lacagtooda qaataan waxa ay xawaalad usoo dhigaan qaybta ay leeyihiin shirkadaha Kenyanka ah ee wax ka galay wada hadalka .
Dowladda Kenya ayaa ka wal walsan lacagaha farada badan ee dalkeeda kasoo galaya dhinaca Burcad badeeda kuwaasi oo kor u qaadaya sicirka maciishada, dhibaata badana ku haysa dadka rayidka ah ee dalkaasi.
Burcad badeeda ayaa waxa ay sidoo kale khatar badan ku haysaa ganacsiga aduunka, waxaana lagu qiyaasay in sanad waliba uu aduunka ku dhubiyo lacag dhan 100 milyan oo dollar, dhibaatada Burcad badeednima awgeed.
