Muqdisho (Alshahid)-Gudoonka baarlamaanka KMG ee Soomaaliya ayaa maanta xukuumada uu madaxda ka yahay Raiisal wasaare Cumar Cabdirashid ugu baaqay in ay maalinta berry ah iska soo xaadiriso baarlamaanka hor tiisa si loogu qaado codka kalsoonida.

Gudoomiye kuxigeenka 1aad ee baarlamaanka KMG; Cabdiweli Sheekh Ibrahim Mudey oo maanta shir gudoominayay kullankii ay yeesheen mudanayaasha baarlamaanka KMG ayaa carabka ku adkeeyay in xukuumada KMG mar hore looga baahnaa in ay hor timaada baarlamaanka balse ay hada u qabanayaan maalinta berry ah in ay ku hor timaado xubnaha baarlamaanka.

Cabdiweli Sheekh Ibrahim Mudey ayaa ugu baaqay Raiisal wasaare Cumar Cabdirashid in uu u dhaga fududaado baaqa maanta uuna xukuumada u raadiyo codka kalsoonida.

Arrintan ayaa ku soo beegmaysa xilli ay sii koordhayaan mudanayaasha katirsan baarlamaanka KMG ee ku doodadaya in xukuumada KMG aysan sharci ahayn maadama aysan marin baarlamaanka tan iyo markii uu Raiisal wasaare Cumar Cabdirashid sameeyay isku shaansheynta golaha wasiirada.